इस अंक में :

डॉ. रवीन्‍द्र अग्निहोत्री का आलेख '' हिन्‍दी एक उपेक्षित क्षेत्र '' प्रेमचंद का आलेख '' साम्‍प्रदायिकता एवं संस्‍कृति '' भीष्‍म साहनी की कहानी '' झूमर '' सत्‍यनारायण पटेल की कहानी '' पनही '' अर्जुन प्रसाद की कहानी '' तलाक '' जयंत साहू की छत्‍तीसगढ़ी कहानी '' परसार '' गिरीश पंकज का व्‍यंग्‍य '' भ्रष्‍ट्राचार के खिलाफ अपुन '' कुबेर का व्‍यंग्‍य '' नो अपील, नो वकील, घोषणापत्र '' गीत गजल कविता

मंगलवार, 10 नवंबर 2015

बनिहार

दीनदयाल साहू

          सेखर गंऊटिया के नाव हा दूरिहा - दूरिहा ले बगरे रहाय।कतको मनखे वोकर घर संऊजिया - चरवाहा बारों महीना लागय। कतको डेहरी के पियास ला बुझाय, अऊ सबके सुख - दुख के अघूवा रहाय। येकरे सेती सेखर गऊंटिया सबो बर भगवान बरोबर रहाय। कोनो ला अपन घर नौकर - चाकर नी मानय, घर के  मनखे सही सबो बर एके बेवहार रहाय। आजकाल अइसन देखे बर कहां मिलथे, अभिन गुरतुर बोली, परेम- बेवहार घलो पइसा मा बेचावत हे। भूखन के दाई ददा सेखर गंऊटिया घर संऊजिया लगत रिहिन। खेती - बारी नी रिहिस। बिहनिया कमाय त संझा चूलहा बरे नीहिते मरे बिहान। फेर बिधाता हा कभू लांघन रेहे के लइक नी आन दे रिहिस वोला। अइसने उदुपहा जर धरिस तिही मा भूखन के ददा बीतगे। दाई ऊपर संसो के पहार टूटगे, ओकर बर तो जग अंधियार होगे। अपन छाती मा पखरा लादके कोरा के लइका भूखन ला पोसत रिहिस।
           भूखन हा नानपन ले बड़ हुसिायार रहाय, पढ़ई करत दाई के सबो बूता म हाथ लमाय अऊ सहारा बरोबर रहाय। भरे बरसात सावन महीना म गंऊटिया खर के निंदई होत रहाय। गिरत पानी फुहारा बरोबर उड़त रिहीस, अइसन लगे जइसे अगास हा सऊहत धरती म आ के ठाड़  होगे। बादर घुमरत रहाय अऊ गरजई घलो होय। भूखन के दाई पेज - पसिया खाहूं कहिके झाला कोती जात रिहिस, मेढ़ पार म चघित ततकी मा बिजरी जगजग ले तरकिस। चारों मुड़ा बग - बग ले अंजोर होके तराक ले बादर हा गरजिस। इसी बिजली के अंजोरी हा भूखन बर अंधियारी के रद्दा धरा दिस। भूखन के दाई ऊपर बिजरी गिर गे।
          नानचुन लइका भूखन बिगर दाई- ददा के होगे। वोकर बर जग अंधियार। न कोनो भाई - बहिनी, न कका - काकी, न अऊ कोनो नता - गोता। काकर डेहरी म जाही, कोन हा रद्दा देखाही। गाँव के मनखे इसी सोच - फिकर मा परगे। काय होही बिचारा भूखन के? देखइया बर करलई होगे। अइसन बिपत कोनो ला झन दे भगवान। देखत - सुनत सब के आंखी के आंसू थामत नइहे। कहसे होही भूखन के। सब कर इही घूमरत हे। कथे ना - जिंकर कोनो नी रहाय ऊंकर भगवान सहारा होथे। तइसे भगवान बरोबर सेखर गंऊटिया भूखन ला अपन डेहरी मा लइका बरोबर पोसिस, कोनो जीनिस के कमी नी होन दिस।
          गाँव भर भूखन ला अपन लइका बरोबर परेम करें, अब तो भूखन के दाई - ददा, भाई - बहिनी गाँव भर होगे। भूखन के चेहरा ला कोनो मुरझाये नई देवय। सबो के दुलरवा अउ मयारु होगे। भूखन बाढ़त गिस। पढ़ई संग दू पइसा आय कहिके थोरिक कमा - धमा ले। बनी - भूती करे मा थोरको लाज सरम नी करिस। अऊ जांगर टोर के कमाय मरो जीयो। ककरो आरो ला भूखन नी लहूटइस। अऊ गाँव भर म भूखन बनिहार के नाव ले जानय। भूखन बिगर बनिहारी करे काकरो कोनो जिनिस ला अइसने लेवत नी रिहिस। इही सबले बड़ा महानता भूखन के रिहिस हे।
          भूखन के बने पढ़ई होय के सेती आघू पढ़े बर सहर के कालिज मा भरती होय बर जवैय्या हे। फेर सेखर गंऊटिया किथे - देख बाबू, तोला सहर नी भेजन। तोर कोनो देखैय्या नई हे, अऊ सहर घलो दूरिहा हे। हमन घेरी बेरी तोर कर आन - जान नी सकन तेकर ले गाँव में रहा। इहंचे हमर मन  सन जइसन तोर बर बनही वइसने करबोन।
          गाँव भर के मनखे इही समझाइन, फेर भूखन सहर जाय बर जिद मा अड़े  रिहिस। लइकापन के जिद ला देख के वोकर मन राखे बर गाँव भर के मनखे सुनता होके सहर के कालिज मा भरती कर दिन। कालेज के छुट्टी रहाय तभो बनी - भूती करके अपन खरचा निकाल डरत रिहिस। भूखन बर उही दुलार अभी घलो बने रिहिस हे। भूखन के हुसियारी ला देख के येकर पढ़ई के सबो खरचा ला सरकार देवत हे। येती भूखन अपन पढ़ई मा उंच होत गाँव के नाव ला घलो बढ़हात जात हे, फेर गाँव भर बर तो वो हा भूखन बनिहार आय। येकर आघू बढ़त अइसे लगत हे जइसे भूखन के बेवहार, बोले - गोठियाय के सबो ढंग हा बदलत हे। अब मोटर - फटफटी मा जवान - जवान, नोनी बाबू मन संग गाँव घूमे असन आथे।
          अब तो कतको बेरा नहाक जथे, भूखन ल गाँव आये। बछर घलो बीतत आत हे, भूान के चेहरा देखई लोगन ला नोहर सही लागे ला धरलिस। अब्बड़ दिन मा सोर मिलिस, भूखन ला बड़ तनखा के चाकरी मिल गे हे। चार चक्का गाड़ी ले डरे हे कहिके। सबो सोंचत हे, भूखन कइसे गाँव आय बर तियागे कस लागथे।
          गाँव के पंचइत भवन मा बइचका होत रहाय, ऊही कर एक ठन मोटर आके ठाड़िस। अब्बड़ झन टुरी - टुरा ला जोर के भूखन अपन संग लाय रिहिस। गाँव वाला किथे - भूखन बनिहार आवत हे भई अब्बड़ दिन मा। अतका ला सुनके भूखन के अंतस हा कलबलागे, कथे - अभिन घलो मैंहा तुम्हर बर बनिहार हरों। दिहाती तुमन कभू नी बदलव, तुमन येकरे सेती ऊही कर के ऊही रहू। मेंहा बनिहार ले आज राजा बरोबर होगे हंव, तभो ले मोला बनिहार कहे बर नी छोड़व। मोर संगी मेरन कतका बदनामी होत हों, तेला तुमन ला काय हे। सहर मा जा के मोर इज्जत मान - सम्मान ला देखव। आज ले कभू गाँव म मोर इज्जत में पानी फेराय बर नी आंव।
          सेखर गंऊटिया भूखन के बहां ला धर के किथे - देख बाबू, सिरतोन कहत हस। तैंहा भूखन साहेब हर अस। तोर रुतबा ला थोरे हबर सकबोन। हमर डहर ले कुछु गलती होइस होही तेला माफी कर देबे भूखन साहेब। तैं हर सहर मा खुस हस ता ये जान ले, हमू मन खुस हन। तोर खुसी ले हमर खुसी हे। गाँव भर के मनखे के आँखी के आंसू धार धर के बोहात रहाय, अऊ भूखन अइसे जाय लगिस खुस हो के, जइसे कोने जघा के धंंधाय अजाद हो गे आज ले।

पता
प्लाट नं. - 429, सड़क नं. 7
माडल टाऊन, पो.- नेहरु नगर, भिलाई (छ.ग.)
मोबा.09752361865

mail: dindayal50@gmail.com  

कोई टिप्पणी नहीं:

एक टिप्पणी भेजें